Норвегиялықтар Қысқы Олимпиада ойындарында жаңа рекорд орнатты
Норвегия құрамасы Қысқы Олимпиада ойындарында ұтқан медальдар есебі бойынша жаңа рекорд орнатты.

Бүгін норвегиялық спортшылар командалық тау шаңғысы спорты бойынша бақ сынап, қола медаль иеленген еді. Бұл жүлде Норвегия құрамасының Пхенчхан Олимпиадасындағы жалпы есептегі 38-ші жүлдесі болды. Осы орайда олар 2010 жылы Ванкуверде АҚШ құрамасы орнатқан рекордты жаңартты. Ол кезде америкалық спортшылар жалпы есепте 37 медаль алған еді. Қазіргі таңда норвегиялықтардың еншісінде 13 алтын, 14 күміс және 11 қола медаль бар.